Беларускія распрацоўшчыкі стварылі бясплатны мабільны дадатак — чыталку аўдыёкніг для дзяцей на беларускай мове «Кніжны воз». Ён даступны ў App Store і Google Play.
«Кніжны воз» — платформа, дзе размяшчаюцца прафесійна агучаныя кнігі для дзяцей і падлеткаў на беларускай мове.
— Я фактычна абіраю тыя аўдыёказкі, якія падабаюцца маім дзецям і якія, я лічу, будуць цікавыя большасці беларускамоўных і ўвогуле беларускіх дзяцей, — кажа распрацоўшчык дадатка Міхась Бутылін.
Платформа існуе з 2020 года. Зараз там можна паслухаць 31 кнігу, у тым ліку аповесць «Ладдзя роспачы» Караткевіча, «Хронікі Нарніі» Льюіса і народныя казкі.